Chronique

Fa ny fitiavana no inona moa ?

Sarotra angamba aloha ny hamorona zava-baovao, mbola tsy fandre sady tsy fahita mihitsy, anefa ny zanak’olombelona efa ho telo arivo taona nanoratana ary folo arivo taona niresaka, nitafa, nampiady karajia.
Eny ho eny, tsinjo ihany, miverina ako, mitamberina, soratra efa tazana, nanaitra fahizany ary mbola tadidy ankehitriny. Nitovy angamba ny boky novakiana, nitovy ny mpanoratra nanaitra, nitovy ny embona sy hanina nitaiza, nanangoly.
Tsy mpanoratra no nahafantarako azy. Tsy mpanoratra mihitsy no nahaizanareo azy. Saingy, hoe, «ireo fotoana nandalovako sy niainako, noraiketiko an-tsoratra, mba hitoetra», hoy izy.
Fa ny fitiavana no mibahana indrindra. Fitiavana taitaitra, fitiavana revo, fitiavana sambatsambatra, fitiavana lefy, fitiavana dila. Vehivavy izy no manoratra : ny tena sarotra angamba dia izaho lehilahy miezaka ny hahatakatra. Izaho, lehilahy, sadaikatra ihany miresaka imaso ny fitiavana tsiambaratelo. Izy, vehivavy, toa manao fanahy iniana hitanisa sy hiventy izany ihany isan’andalana, isan’andininy. Ampahibemaso.
Dia ireto miverina matetika, teny, heno sady tsapa fa niaina, niainana, fiainany.
(Ianao)
Any an-kafa
(Izaho)
Tsy hisakana
Tsy hitazona
Izaho tsy ho anao
Ianao tsy ho ahy
Tsy anjarako ianao
Fantatrao, fantatro
Tononkalo telo samy hafa amin’ny amboara «Vetsovetso-pitiavana» (Ranjasoa Publishing, Washington D.C., 2018) ireo no niniako nosinganina dia natambatro aty ambadika. Asa, inona loatra. Iza loatra.
«Rediredy» hoy ny lohateniny, rediredy tokoa moa izany :
Fo adaladala sahy misangisangy fitia
Hafaliana miharo ahiahy tsy haiko ho lazaina
Satria dia fitiavana tsy mba azo tantaraina
Azafadin’ny Ambaniandro, vao mody manatsafa hoe «Ho hadisoako ve» :
Fitia angalarina, afenina, fa tsy marina
Ilay izy niserana an-doha, nandalo ny saina, izay tsy diso taminareo no aoka hitora-bato azy. Fa ity izy vita diam-penina, vakiana bantsilana no tsy mahazatra. Tsy misy teny ratra, fa tsapa misy fery. Ka mitady olatry ny taona ve no mikiky tako-pery. Toetra. Manan-toetra.
Fa angaha vitan’izay. Asa izay ho fandraisan’ny faribolan’ny mpanoratra azy, fa io, efa ho lasa tantara mitohy ilay «indray miseho». ho hitanao atsy ho atsy :
Pardon, Merci, Je t’aime
Azafady, Misaotra, fa Tia
Le Nous devient Tu et le Tu en Je
Isika lasa Ianao manjary Izaho
Tantara hafa. Tantara mitohy. Topimason’i Fanja Rakotondrainibe.

Commenter

Ce formulaire recueille votre nom et adresse e-mail afin que nous puissions valider votre commentaire. Veuillez consulter notre politique de confidentalité afin de prendre connaissance sur la façon dont nous protégeons vos informations.
Je consens à ce que L'Express de Madagascar collecte mon nom et email..

Cliquez pour commenter