Mamalan-kira indray VANF : Akoho ela nitsindrohana


Rimbona indray ny Tarika MAHALEO : nanara-dia an’i Raoul sy Nônô indray koa Fafah. Tantara niaraha-mahalala, niaraha-niainana, niaraha-nikalo (na namalan-kira) ny fitadiavana «billet», filaharana «concert», horakoraka nahafarim-peo rehefa anaty «salle».

Ny sasany tamintsika, afaka nifanerasera akaiky kokoa tamin-dry zalahy. Samy nanana izay nahavantana azy. Samy nanana ny taranjany avy. Fa arak’ilay hira :

NY FIHAVANANAY

Ny fihavananay

Fihavanan-kalo

Ny hira no nampiray

Tsy nananam-pahavalo

Ny fihavananay

Fihavanam-po

Raha ory ny iray

Ny rehetra no mana-manjo

MAHALEO, fito lahy nahay nampirevy ny rehetra satria nitovy revy tamin’ny rehetra. Miandahy, miambavy, efa areti-mifindra mitety taranaka telo hatramin’ny 1972 : fito ka hatramin’ny fito amby fitopolo moa ? Tonony hay tsianjery, feony mamoha-fota-mandry avy hatrany. Izay alzheimer sisa no asa.

Ny fahatsiarovana samy hanana ny azy, ny alahelo samy hitondra izay tandrify azy. Ny ahy ireto no mba zaraiko. Tsy misy feo, tsy ilàna «Sôlfezy» : efa tonga antsaly an-tsaina, am-po. Anakampo.

Ny feo miavak’i Fafah, ny feo tokan’i Fafah, toa amin’ny «RAFAHAFAHANA» no tena mampisongadina ny haavo takany ka mampangiana toa mivavaka ny efitra manontolo :

Nefa, fitia tsy mety ritra,

Mikiry sy maditra

Natokako ho an’ialahy

Iandrasanao hitondra takaitra

Izay angamba ianao vao ho taitra

Sao dia mba tara loatra !

Aoka aho, mba ho tompon-tsafidy

Mba tsy avela hihidy

Ity vavako miteny

Ampy ho ahy izay

Nitondra mangidy

Tsy tiako ho tadidy

Ireny rehetra ireny

Raha eo ialahy,

Hiteny ireo nangiana

Fahafahana no iriana

Ho an’ny taniko

«ISEKELY» : Toa heno avy hatrany, ary efa ampoizina, amin’ny «enregistrement» ny tehaka sy sioka falifaly vao manome feo ny gitara :

Isekely ihany

No mba mamiko

Faniriako hatry ny elabe

Masoandroko, fifaliako

Ka tsy mety ho adinoko

Isekely no fitaratra

Hitarafana ny fiainana

Na ny masonao na ny tsikinao

Mba omeo sary ataoko ambany ondana

hiantsoana ny nofy

Nofinofintsika roa

«FAHALEMEN-DEHILAHY» : Lehilahy tia Vehivavy tia Lehilahy, tokoa. Revin-dehilahy mety manafintohina indrindra raha hoe, «Fahavalo, areti-mandalo, tsy anenenako». Avy mivazo «Isekely ihany» dia «mamangy tany sy havoana vaovao»... Mahaleo...

Ny fahalemeko

Fahalemen-dehilahy

Resy aho, ekeko

Resin’ny fakam-panahy

«ANKIZY TOA VERY DIA» : Izy efa-dahy tavela no tena «ankizy nilaozan’ny tiana». MAHALEO hatrany, hoy isika rehetra, saingy ho MAHALEO inona, MAHALEO ahoana, MAHALEO iza ?

Ankizy toa very dia

Sendra nilaozan’ny tiana

Ity foko mbola tia

Mitomany sy ory mangiana

Tsy misy saro-dresena

Toy ny fahatsiarovana

Ny tarehiko mando sy lena

No marik’izany Rahavana

Maloka tampoka teo

Ny lanitra manga fahiny

Rahona no indro eo

Nanakona iny fitiavako iny

Ny volana mihidy an-trano

Tsy nety nanazava intsony

Tsy ririnina tsy lohataona

Fa maizina ny lanitra ambony

Baliaka ve ny masoandro

Any aminao lavitra any

Tsy alina tsy antoandro

Fa ny aty maizim-pito ihany

«REHEFA MATY AHO» : Adinodino matetika fa tononkalon’i Jasmina Ratsimiseta (1890-1946) ity no nasian-dry MAHALEO feony.

Raha ho avy, Ralala, ny taona hodiako

Ao ambanin’ny tany tsindrian-drangolahy

Ka ny vato hisolo ny kidoro hatoriako

Voleo voninkazo eo an-dohan’ny fasako

Fotsy sy Mavo ary Manga sy Mena

Ny Fotsy ho marik’ilay fahadiovana

Ny endriny Mavo, ny fofony manitra

Ny Manga ho marik’ilay fihafiana

Ny Mena ho taratry ny afo tsy maty

«TIA DIA TIA»

Raha izay ditra foana

Tsy nisy tsy nanao

Rehefa tonga ny andro

hifaranan’izany

Akoho ela nitsaingohana

tsy maintsy drodroka ihany

Fitiavana, ho raketina ho boky

Tsisy resaka afa-tsy fifanomezan-toky

Ho feno sary, sarim-pahasambarana

Ny pejy farany misy hoe mbola tsy mifarana

Ka indray andro ihany

Fahafatesana ihany no hamarana izany

«Fahafatesana ihany, no hamarana izany». Eo indrindra isika izao. Akoho ela nitsindrohana, tsy maintsy drodroka ihany. Mandria am-piadanana.

Plus récente Plus ancienne